Hunyo 19, 2018
Hugot nga gikondena sa Kahugpungan sa Lumadnong Oraganisasyon sa Caraga (Kasalo-Caraga) ang nagkagrabeng pagpaantos ug pagkadislokar sa mga komunidad sa Lumad ug mag-uuma. Gitugaw na usab ang ilang mga komunidad sa mga kriminal ug bayaran nga Armed Forces of the Philippines nga sakop sa 29th IBPA nga nag-operasyon sa Sityo Zapanta Valley, Brgy. Bangayan, Kitcharao, Agusan del Norte. Nagka-igting ang pagpamig-ot ug pagpanglutos sa mga inosenteng sibilyan diha sa mga komunidad, pagpasangil kanila nga mga NPA ug pagpasurender kanila. Tungod sa kahadlok nga patyon, pugson usab nga pasurenderon o kaha dakpon ug presohon sa mga sundalo, pugos nga mihawa ang mga Lumad ug mag-uuma sa ilang komunidad aron molikay sa maong pagpanglutos.
Niadtong Hunyo 6, 2018 miabot ang dili moubos sa 100 ka personahe sa mga sundalo sakop sa 29th IBPA sa Sityo zapanta Valley nga miipon pundo sa mga kabalayan. Samtang anaa ang mga sundalo nakig-ipon sa mga sibilyan, padayon ang ilang mga binuhatan pagpang-interrogate sa mga yanong sibilyan nga paangkunon nga mga masa ug tigsuporta sa NPA. Pagka-Hunyo 7 sa gabii, adunay nahitabo nga engkwentro tali sa mga sundalo ug gituohang mga NPA. Sinugdanan kini sa sunud-sunod na nga mga engkwentro sa bukirong bahin sa mga komunidad ug pagdaghan sa mga sundalo sa ilang komunidad nga kabahin sa ilang aktibong operasyong kombat sa Zapanta.
Hunyo 12, 2018 sa may alas 3 sa hapon kun kulang, nagkahiusa nga mamakwit ang 122 ka pamilya ug 542 ka mga Lumad nga Mamanwa ug mag-uuma, apil ang mga bata, tigulang, buntis ug anakan, tungod kay gilimitahan na ang pag-adto nila sa uma ug pagdala og pagkaon pasulod sa ilang komunidad. Subling gibaktas nila ang 9 ka kilometro gikan sa Sityo Zapanta padulong sa barangay hall sa Brgy. Bangayan aron madepensahan ang kaugalingon. Samtang anaa sila sa evacuation center nga nagpakalma ug nagpahulay sa kakulba ug kalisang nga gibati, gisunud-sunoran sila sa dili moubos sa 20 ka mga armado sakop sa 29th IBPA ug daw mga piniriso nga gikontrola ug binantayan ang ilang mga lihok sulod sa evacuation center hangtud sa kasamtangan.
Hunyo 14, 2018 sa may alas 10:00 sa buntag mibisita ang pipila ka membro sa mga organisasyon sa tawong simbahan, mag-uuma ug Lumad aron maghatag og hinabang nga pagkaon sa bakwit. Gipugngan sa mga sundalo nga direktang mahatag ang pagkaon ug mahimamat sa mga nagdala niini ang mga bakwit kay kuno gobyerno ra ang dunay katungod nga mohatag og relief. Dakong bakak! Samtang nag-logbook ang grupo sa relief team sa opisina sa barangay, gikuhaan sila og picture sa naka-sibilyan nga sundalo nga nagpailang usa ka Sgt. Acosta. Tataw nga paningkamot kini aron hadlokon ug abogon ang mga naghatag og hinabang. Pagka-walay kukaluoy sa mga sundalo sa paghikaw sa mga bakwit sa pagkaon ug sa pagpagawas man lamang sa ilang gibati nga kalisang! Sobra na ang pagpaantos ug pagpagutom sa mga bakwit!
Niadtong Hunyo 17 sa may alas 8:30 sa buntag, gikarga sa dumptruck ang mga bakwit sa Bangayan ug gidala sa mga sundalo sa Little Baguio, Brgy. San Roque sa Kitcharao. Matud pa sa mga sundalo, adunay ipahigayon nila nga pulong-pulong sa mga bakwit. Laing taktika na usab kini sa AFP nga pasurenderon ug pugos nga paangkonon nga mga NPA ang namakwit. Sama kini sa nahitabo sa mga Lumad nga Mamanwa ug mag-uuma sa Purok 3 ug 4, Brgy. Mahaba, Cabadbaran City niadtong Hunyo 15, 2018. Pugos nga gipasurender ang dili moubos sa 70 ka pamilya nga gipaangkon nga aktibong misuporta sa NPA. Pugos silang gipahural atubangan sa 29th IBPA. Klaro ug tataw kaayo sila mga inosenteng sibilyan, dili mga manggugubat nga NPA ug walay basehan nga pasurenderon.
Kini ang gihimo sa Martial Law sa Mindanao – pag-atake sa mga komunidad, pagpanglutos, pagpanghadlok ug pagpasurender sa yanong sibilyan aron moundang sa pagpuyo ug pagdepensa sa yutang gibaligya na sa mga negosyante aron tukoran og planta sa kuryente, ekis-ekisan sa mga dagko ug hawan nga dalan nga agian sa mga produkto sa langyaw’ng minahan ug plantasyon.
Nanawagan kami nga seryosohon sa gobyernong Duerte ang panaghisgot sa kalinaw tali sa GRP ug NDFP aron matuldokan na kining nagkaigting nga problema sa katawhang Pilipino nga giatubang ilabina namong mga Lumad nga biktima sa militarisasyon. Niining pagkadiskaril sa panaghisgot sa kalinaw, dakong pagkadismaya namong mga Lumad sama sa ubang katawhang Pilipino nga nangandoy og tinuod ug malahutayong kalinaw nga nakabase sa hustisya.
Ihunong ang pagpangatake sa mga Lumadnong komunidad!
Batukan ang pasismo sa rehimeng US-Duterte!
Ibasura ang Martial Law sa Mindanao!
Undangon ang peke nga pagpasurender sa mga inosenteng sibilyan!
Undangon ang militarisasyon sa mga Lumadnong Komunidad.
Depensahan ang yutang kabilin!
Barugan ang katungod sa kaugalingong paghukom!
